Undanúrslit VÍS bikars kvenna í kvöld

Báðir leikir undanúrslita VÍS bikars kvenna verða leiknir í kvöld, og sýndir í beinni útsendingu á RÚV 2.

Fyrri leikur kvöldsins er viðureign Fjölnis og Njarðvíkur í Dalhúsum í Grafarvogi, en leikurinn hefst stundvíslega kl. 18:00. Seinni viðureignin er milli Vals og Hauka í Origo höll Vals, sem hefst kl. 20:00, en þessi lið mættust einmitt í úrslitum úrvalsdeildar kvenna snemmsumars.

Eins og áður segir eru báðir leikirnir í beinni á RÚV 2, en sigurliðin komast í VÍS bikarúrslitin 2021, hvar leikið verður í Smáranum á laugardag kl. 16:45.